知道好多朋友都覺得，我近來對婚禮行業嘅前景多咗憂慮。畢竟做咗咁多年，近年確實覺得失望，尤其係婚禮音樂…
以往傳統上，大部份嘅高級婚宴都會請菲籍或西人樂隊演出，華人樂隊彷彿未能登上大雅之堂。但我覺得樂隊絕對需要配合整個晚宴流程，樂手要作出音樂上的安排來配合現場氣氛。試想想，如果樂手連個司儀講乜都唔知，㸃俾反應呀？將心比己，我都無信心做好一對韓國人的婚禮。
所以咁多年來，我都致力支持華人樂手，為他們爭取最多的掌聲及最大的尊重。
近年亦多咗好多年青樂隊出現，質數如何，我不予置評。但接連從客人及酒店行家口中得知，他們不論在樂手及器材安排上，或當日演出的表現均未如理想。主要問題是聲浪太大，音響質素欠佳，樂手水準業餘，胡亂選曲以致整個晚宴毫無格調可言。亦因為咁，依家有好多客人對華人樂隊嘅印象好差，甚至放棄選用樂隊，情願播碟罷了！
唉，我近來見客都要用上大量時間解釋，重新讓客人接受樂隊。
無可否認市場大咗，多咗好多競爭。但好想講，我花咗好多時間心機去發展，見到呢個情況真係好難過。好希望同業們去多啲了解婚宴流程和客人嘅需要，在音樂及音響上好好裝備自己，真正達致專業水平，才可令婚禮音樂行業健康發展。
千萬不要用業餘水準配以廉價package
去搵三兩年快錢，這只會拖誇整個行業！真正專業的樂師最少需要花上以十數年計的時間學習及累積演出經驗的，請大家尊重他們!
我唔介意跟大家分享呢塊餅，但我十分介意你去踩爛佢！
共勉之！
